منتدى قبيلة الزبون - قصيدة صالح ابن دحام وقصتها رحمه الله

في عام 1369هـ تقريبا يسمى سنة الجنوب صار الربيع بتلك الجهة من ديار عتيبه واتجه اليه معظم عشيرةالزبون ومعهم صالح ابن دحام بن رشود بن عتيق فصار مرباعهم في (ابو جلال) و( عريفجان) وفي القيظ تقسموا على مناهل (القراره)و(امشاش سلام) و (الحبرديه) والاخيره هي ابار مفرح الثقيل الحبردي العتيبي والتي عليها صالح بن دحام ومن معه وحينما دخل فصل الوسم واوشكوا على الرحيل ناحية الشمال قال مفرح الثقيل حين ودعهم
شدوا من عندنا ذريفين الايمان اعيال زبنه محتمين التوالي.
عزالله انهم خمسة لي بالايمان والكل منهم رفيق موالي.
فرد عليه صالح بن دحام بقوله
يابو فرح عديت راس الطويلي ,,, من ضيقة بالصدر ماهي هوالي.
بملوح عسر على المميلي ,,, ابراس عيطا من طول الجبالي.
عسا وطنكم يامفرح يسيلي,,, وياتي من المنشا صدوق الخيالي.
من مزنة غرا وحمها يهيلي,,, تباشروا به ربعتي يوم سالي.
يسقى من الضلع الحمر للنخيلي,,, وهضاب غال ومعطشات الدحالي.
وتشوف سيله يتل المسيلي,,, وغثوه على حد الزبار الشمالي..
مالوم عيني لو تجيبه هميلي,,, من بعد دار مطوعين العيالي..
اليا صار جيلهم من مواريث جيلي,,, والذيب مايسقم بليا حلالي..
يوم جانا اللي حنا عليهن نشيلي,,, اخذ الوداع وعاف باق النوالي.
سلم على سلطان هو الغفيلي,,, وابن شليويح الرفق الموالي..
قبيلة ماعاد فيها مميلي,,, متعب ويوسف والرجال الغوالي.
ودغيليب شوق اللي تكد الجديلي,,, وان اقبلن الرمك بالعيالي ..
زين الركاب اليا عتلقهن جفيلي,,, وعمار اهلهن شيف فيه الزوالي..
اولاد روق وللحرايب تهيلي,,, وان عزل الصابور عند التوالي..
ذباحة الكبش السمين المحيلي,,, وشراية للبن لو قيل غالي..
سلم عليهم كلهم يا الثقيلي,,, لما لموم وخصهم بالكمالي..