عــادات وتقاليد يقع ضحيتهــا "الأبنــاء" تتردد في مسامعنــا هذهـ الكلمه(البنت لولد عمها)

وربما تحجز له من يوم ان كانت في مهدها ..!!

لا ننكر أن اغلب قصص الحب تكون بين بنت وابن عمهـا ,,ولكن لكل قاعدهـ شواذ ..!

اليكم هذهـ القصيدهـ الرااائعه التي تحمل في طياتها آلام الفراق والحــب :


دعَتْني وجيت للموعد وكنت مْن الفرح كالطير

وجيت من العصـر طايـر مـع أن الموعـد المغـرب

وجتني بس مدري ليه شعرت الجيّة هذي غير

وهي تقرب من عيونـي شعـرت أن الممـات أقـرب

وقلت الله يهوّنها عسى في جيّتـك لـي خيـر

أنـا مـن شفتـك أقبلتـي وأنـا خايـف ومستغـرب

على كثر الحكي مـدري كأنّـه خانهـا التعبيـر

وقالـت لـي جُمـل وأشيـاء لا تكتـب ولا تعـرب

هدت فجأة تطالعني وأنا في حاجة التفسير

لجل نحكـي بهـدوء أكثـر سألـت: الحلـوة وش تشـرب

فصاحت بي أنا أحبك ولك في هالحشـا تقديـر

وتـدري أن المثـل فينـا وفـي إحساسنـا يُضـرب

وكنت أنت الوفي وأنت البري من تهمة التقصيـر

ولكـن ذي عوايدهـم مـن أيـام وزمـن يثـرب

تكون البنت لأبن العم ورغبات الكبار تصير

وتدري الأقربـون أولـى .. مـع أنـك للخفـوق أقـرب

وتدري للقدر كلمـة.. لعـادات الأهـل تأثيـر

لـذا أرجـوك تتركنـي وأنـا مـن واقعـك باهـرب

شعرت بحكيها كنّه قصاص وأمر بالتعزير

شعرت الدنيا ضاقـت بـي مـن المشـرق ليـا المغـرب

مشت خلّت وراها طفل ما يدرك وش التدبير

يحسـب أن الغـرام أشعـار شاعـر وأغنيـة مطـرب

ضحكت وماقدرت أني ألاقي لضحكتي تبرير

من اللـي بوقتنـا مـرّه ضحـك مـن لدغـة العقـرب

رفضت أستوعب اللي صار ولا أستسلمت للتغيير

ثمان سنين اجي نفـس المكـان بساعـة المغـرب

ورغم أن الثمان سنين جروح وكلّفتني كثير

أنا لليوم أجي وأدعي.. تجي يارب .. تجي يارب..!!