نشوف قلوب ما تصفي وفيه قلوب مثل الشاش
رجال رابحه ورجال مـا تحصـي خسايرهـا
أحد طيبه يسر البال واحد مـا وراه عـراش
طبيعـه والطبيعـه صعـب راعيهـا يغيرهـا
سليم العقل راسه بالمواقـف دايـمٍ شـواش
ولا له رغبـةٍ فـي عالـمٍ ماتـت ضمايرهـا
يعيش اللي يحب المرجله ومن المراجل حاش
ورجله مع طريق الخير تمشـي مـا يحيرهـا
حفظ دينه وعرضه والفعايل يبـردن الجـاش
وجنب عن صغيرات الذنوب وعـن كبايرهـا
على عز ومعزه عاش ما هـو للفتـن نبـاش
ويفرق بيـن كـل النـاس طيبهـا وبايرهـا
يعرف اللي على كثر المشاكل والحيل يعتـاش
وهذي مشكلـه وأسبابهـا خافـي سرايرهـا
ومن هذي حياته بالسعاده والهنا مـا عـاش
ولا يامـن رحـى الأيـام لا دارت دوايرهـا
لعل الله يسوق المزن وكبود العبـاد عطـاش
والى لاحت بروق الوسم تعلن فـي بشايرهـا
لشاعر...أحمد بن سعود الحمد